رعودي الكرخي ||
تراب ونبجي طين، وعگد هم مگطوع .... شحيح الماي مخبوط و وطن مفجوع
انا ادريبك وطن منباع من الگوم .... نفطاتك تلف، لْحد الگشر مبیوع
لا خبز وهني وفوگ الطبگ موضوع .... ولا طابگ سمچ .. بس العطش والجوع
الله بعونك وراسك غزاه الشيب .... هم ضيم وقهر، ثوبك خلگ ، اسود ، وهم مرگوع
مأزوم الوكت ، مبلي بنذل نشّال .... متروس الجيوب وبوگته للكوع
منهوب السلف ، حتى السعف مبيوگ .... وجذوع السگف ويه الدنگ مگلوع
مصيبة وطاحت براس الشعب یاناس .... تحجي لو تسكت سوه، چن الحيا منزوع
جان اليغلط إتكله الزلم بسك غلط يعضيد .... من كون الغلط ، هم زحمه ، هم مرجوع
دغار وصار، شگبان الغلط هل اليوم .... لا وسفه البقت ، ولا من عتب مرفوع
إينام الشعب ليله ويصحه عل الأزمات .... إزمال إلـيگوده ، وسايسه جربوع
من جلّه ، لنقيصه ، وجيسه هم مزروف .... طرگاعه اللفتنه و الأمل مگطوع
ملوم الطاح عل العِلّه وكشف لأسرار .... جم زاغور ، جم حوّاف، جم "مشروع"
خفايا وهم رزايا ، وهم ترس ماعون .... يا ماعون! ، يا طشت اليلم كل الحجي الممنوع
لا تلجم جروح الفقره من تحجي .... تره وَيَّه الأكل موس وصُفَهَ مَبلوع
شحجيلك بعد، كل النفط بالجيب .... للأردن وصل ريعه، وأنا المخدوع
شحجيلك شكلك والعگل راحت .... يموت الشيخ، يترأس وراه مگموع
يتعفرت علينه وصايته بريسم .... مضايفنا الگبل صارت شُعب وفروع
كل فرعِ يتشـّـعب لازم إطّـيعه .... شسولفلك يخويه والفتگ مدروع
واردن للحگوگ الراحت إمحاصص .... ما وصلت لأهلهه، ولا نَبِتْ مزروع
تعيش الظيم هلوادم من الباگو .... فرهود إللفاهه والبلد موجوع
الدواعش فجرت بيتي ورحت للسوح .... أواجه طغمة التكفير ما مفزوع
ومن رديتهم عن السلف والكاع.... بالنكران گابلني النذل مصروع
واجهني بحرب يومية بالعيشه .... ما بقــّه وترك حته الستر مخلوع
فرهد كل حلالي يريد ينطيهه .... للاردن ، مصر، للِبسفرته يربوع
وردت داعش من جديد تتنمر.... وردّ النذل يجزيه بورد وشموع
وردّت أخذت فلوس التفگ مني .... وانه من الألم مثبور جن ملسوع
صدگ راحت جروح الساتر بصفقات .... وشريان الشهيد اللي صفه مبيوع
عجيبه بهل بلد ،كل درب بي ديوث .... فاجر ، فاسق ، وباللؤم هم منگوع
لامريكا صفه أخذ الرأي والشور .... ولإسرائيل كل سافل صفه متبوع
وأبناء الشرف غربه صفو بالدور .... متكترين لا جلمه ورأي مسموع
ميخالف گضت ، ويگضي الوكت حتماً .... حتماً ترتوي الدنيا بسقي الينبوع
بالمهدي إنتنومس ينطي حق الناس .... ومن نوره تشع كل الأرض بسطوع
ــــــ 23/05/
https://telegram.me/buratha
